Өңірлер, қоғамдық және этномәдени бірлестіктердің өкілдері – Қазақстан Халық Кеңесінің құрамы жарияланды
2026 жылғы 22 қыркүйекте Қазақстан Республикасының Президенті Қ.Тоқаев «Қазақстан Халық Кеңесінің құрамын бекіту туралы» №1474 Жарлыққа қол қойды. Құжатқа сәйкес Қазақстан Халық Кеңесінің құрамы бекітілді. Жарлық қол қойылған күнінен бастап қолданысқа енгізіледі.
Қазақстан Халық Кеңесінің құрамына барлығы 126 азамат енді. Олардың қатарында мәслихат депутаттары, Қоғамдық кеңестердің мүшелері, қоғам қайраткерлері, этномәдени бірлестіктердің өкілдері, ғалымдар, педагогтер, журналистер, кәсіпкерлер, спортшылар, мәдениет және басқа да салалардың мамандары бар.
Кеңес құрамында еліміздің әртүрлі өңірлерінің өкілдері қамтылған. Олардың қатарында облыстар мен республикалық маңызы бар қалалардың мәслихат депутаттары, Қоғамдық кеңестердің төрағалары мен мүшелері, өңірлік ұйымдардың өкілдері бар.
Ұлытау облысынан Қазақстан Халық Кеңесінің құрамына Маткенов Мұрат Қадерұлы кірді. Ол – Ұлытау облысы мәслихатының депутаты, Қарсақпай металлургия зауытының директоры.
Қазақстан Халық Кеңесінде этномәдени бірлестіктердің өкілдігі де кеңінен қамтылған. Атап айтқанда, құрамда әзербайжан, армян, белорусь, дүнген, корей, қырғыз, литван, неміс, орыс, славян және казак, татар, түрікмен, ұйғыр, украин, өзбек, шешен және ингуш, сондай-ақ басқа да этностардың этномәдени ұйымдарының өкілдері бар.
Құрамға қоғамдық ұйымдар мен кәсіби бірлестіктердің өкілдері де енгізілген. Мәселен, Дәулеталин Сатыбалды Телағысұлы – «Қазақстан Республикасы кәсіподақтар федерациясы» кәсіподақтардың республикалық бірлестігінің төрағасы, Жанықұлов Жұмабек Есілбекұлы – «PARYZ» Қазақстан Республикасы Жұмыс берушілердің (кәсіпкерлердің) ұлттық конфедерациясы» заңды тұлғалар бірлестігі төралқасының төрағасы.
Ғылым, білім және мәдениет салаларының өкілдері де Кеңес құрамынан орын алды. Олардың қатарында Әбіл Еркін Аманжолұлы, Қайдарова Диляра Радикқызы, Мұқанова Роза Қажығалымқызы, Омаров Бауыржан Жұмаханұлы және басқа да мамандар бар.
Қоғамдық диалог пен азаматтық бастамаларды дамыту бағытындағы ұйымдардың өкілдері де тізімге енгізілген. Атап айтқанда, Бапи Ермұрат Сейтқазыұлы, Жүсіп Нұртөре Байтілесұлы, Жаңбыршин Еділ Терекбайұлы, Сабильянов Нұртай Салихұлы сияқты қоғам қайраткерлері Қазақстан Халық Кеңесінің құрамына кірді.
Кеңес құрамында жастар ұйымдарының өкілдері де бар. Мысалы, Сүлеймен Олжас Серікбайұлы – «Qazaqstan Team» республикалық қоғамдық жастар бірлестігінің жетекшісі, Тахтай Василий Сергеевич – «Дала қырандары» жастар қоғамдық бірлестігінің үйлестірушісі, ал Тұрдалиева Ақнұр Нұрталапқызы – «Жас Ұлан» бірыңғай балалар мен жасөспірімдер ұйымы» республикалық қоғамдық бірлестігінің төрағасы.
Журналистика саласының өкілдері де Кеңес құрамына енді. Олардың қатарында Алтай Алмас – «Eco-social» қоғамдық бірлестігінің мүшесі, журналист, Көпжасарұлы Ерқанат – «Ақпараттық-ресурстық орталық» қоғамдық қорының мүшесі, журналист. Сондай-ақ «Атырау» облыстық қоғамдық-саяси газетінің бас редакторы Қосшиев Назарбек Төлеуішұлы да Қазақстан Халық Кеңесінің мүшесі болып бекітілді.
Қазақстан Халық Кеңесінің құрамында спорт саласының белгілі өкілдері де бар. Атап айтқанда, Мельниченко Юрий Васильевич – «Қазақстан күрес федерациясы» республикалық қоғамдық бірлестігінің вице-президенті, еңбек сіңірген спорт шебері, ХХVІ жазғы олимпиада ойындарының чемпионы. Байрамуков Ислам Ильясович – еңбек сіңірген спорт шебері, ХХVІІ жазғы олимпиада ойындарының күміс жүлдегері.
Сонымен қатар Кеңес құрамына Қазақстанның Еңбек Ерлері де кірді. Олардың қатарында Зенченко Геннадий Геннадьевич, Мақышев Тұрсынбек Шамбұлұлы және Шағыртаев Имамзада Қуанышбайұлы бар.
Жалпы, бекітілген құрам Қазақстан қоғамының түрлі салалары мен топтарының өкілдерін біріктіреді. Құжатта өңірлердің, қоғамдық ұйымдардың, этномәдени бірлестіктердің, кәсіби қауымдастықтардың, ғылым, білім, мәдениет, спорт, жастар және ақпарат салаларының өкілдері қамтылған. Қазақстан Халық Кеңесінің толық құрамы Президенттің 2026 жылғы 22 қыркүйектегі №1474 Жарлығымен бекітілді.